2010.05.15 恩祈生日快樂！今日行程非常緊密地為佢慶祝生日：上午Sinapore Zoo.下午就會去USS (Universal Studio Singapore).
一早由酒店搭的士去動物園，可能係周末，20分鐘就到咗，費用S13.8好抵，八點半開門，我哋早咗十分鐘，恩祈周圍同啲假動物影相，佢同假嘅就好熱情，同真動物就唔多情願。
一去到搵北極熊先，香港未有呀嘛，點知熱得滯北極熊躲起來，後來再探第二次就見到不過好遠都影唔到，恩祈只好同紙板Polar Bear合照啦，佢只係到Polar Bear個肚腩咁高咋。
再睇咗少少草食動物，就夠九點要去餐廳食呢個非常聞名的Jungle Breakfast with Wildlife.大人每位S25++埋單S58.8.小童六歲以下免費，雖然三百零蚊我覺得好值得一試，世界上冇乜邊度可以同珍貴的紅毛猩猩一齊食早餐。
今日恩祈生日，Sinapore Zoo除咗免費入場外，仲送咗呢個Birthday badge比佢，有呢個襟章可免費嘆雪糕同買嘢有九折等。
開始我哋個森林早餐啦，係buffet style.好似大酒店好多嘢食，我哋早十日前已book位，可以坐到一陣對住紅毛猩猩坐的位置(後面啲樹木就係比佢哋坐同食早餐)，真係最佳觀賞位置，可以一邊食一邊睇。
啲食物好多款又好食，恩祈最欣賞啲皮蛋粥同點心(冇蝦的蝦餃同燒賣)。
九點半主角正式出場了.....唔係由人帶佢哋入嚟，係佢哋知開餐時侯到就由隔離佢哋個地盆經樹枝爬同飛身跳落嚟(唔記得講比大家知呢度啲動物都係自出自入全部冇籠！)
每個食緊嘢嘅人都放低嘢食嚟排隊隊同紅毛猩猩家族合照。
恩祈雖然"鍊"住個鼻影相但都好合作啦，幾乎所有差唔多大的鬼仔鬼妹一見咁大隻King Kong似的猩猩都嚇到大喊要走呢！
同媽咪合照背後的猩猩bb好得意呀，仲影到佢食緊媽媽奶。
恩祈小朋友同猩猩小朋友動作好相似呀，猩猩仔不停有生果早餐供應，睇佢食緊紅毛丹幾happy.
一家三口爸爸仲攬實妻兒好溫馨動人的情景。
佢好似研究緊定玩緊我啲頭髮咁。
同場仲有啲其他小動物同蛇近距離比哋我睇同摸，但我哋都興趣不太.......十點左右，幾位餐廳職員突然拎咗碟小蛋糕出嚟唱生日歌"Happy Birthday to Yankie"，恩祈個樣又驚又喜，因為突然出嚟我又影唔切就唱晒成首生日歌啦。
估唔到動物園仲送咗隻長頸鹿公仔比恩祈做生日禮物，佢真係好開心同好鍾意，佢仲同長頸鹿改咗個名做"當當"，當晚瞓覺都攬住一齊瞓。(佢從來都唔攬公仔瞓)
當當睇住恩祈食蛋糕："快啲食啦，仲有好多節目去玩。"
沒有留言:
張貼留言