由Jungceylon行番Mecure.正午時分真係曬到正曬到對腳彈起(我腳面燶咗)，以全速15分鐘跳番酒店，恩祈飲番支大支泰國版Mickey mouse益力多解渴先，Lobby一行入去就係泳池，跳入泳池最爽呀，睇佢精神晒。
bb池先熱吓身
外貌成熟的鬼妹bb愛黏著恩祈
daddy開始"的"佢自己游，初初個樣好怕死。
玩熟咗之後佢真係著咗件水泡衫就可以自己在深水處游呀游，唔肯停。
好有自信咁，玩咗足足一個下午，一啲倦意都冇。(應該好攰，曬咗半日又游咗半日喎)
跟住急急腳去梳洗，book咗六點食晚飯呀！今日其實係我生日，眨吓眼，居然42歲了，諗諗吓，二十年前又係在布吉島過22歲生日，睇吓62歲又會唔會係布吉過呀！........今晚生日，就豪啲上半山腰近Novotel最出名的高級餐廳Baan Rim Pa食吓飯慶祝，淨係來回坐Tuk Tuk都用咗400baht(公價200baht一程)只係5 minutes 咋！
呢度年年都攞泰國最佳泰菜餐廳獎，食fine dining又有Piano Bar.正！
呢張相可睇到其實間餐廳係依崖而建聳立在峭壁上，在半空伸入樹林間，外型好特別，我哋仲book到包廂位更private.居高臨下望到Patong Beach壯麗的無敵海景真係一流。
又要唱吓生日歌
可惜今日多雲，如果好似前日在Lotus睇到的咸蛋黃日落一定更震撼。
但係小朋友唔識欣賞浪漫，有埋畫紙比佢油都猛話要走唔開心樣。
打開menu果然不同凡響....個price.見到咁貴又唔知個portion幾大，就叫咗頭盤先。
個mixed appetizers好大份又最好食(795baht!)好鬆脆，碗海鮮冬蔭功湯好細碗但好多料好濃郁(當然亦好辣)係飲過最好飲的，可推介！沙嗲串燒就麻麻啦，好鞋口呀唔好食嘅，仲有千祈唔好飲芒果汁，淡到開水咁仲要成115baht.真估唔到。
真係好啦，未食主菜我同老公居然飽咯，仲食剩啲串燒唔想食。就咁樣連埋車費食一餐都差唔多成三千baht($700蚊)，呢度嘅人均消費要四五百蚊，都差唔多啦。可憐恩祈又悶又冇乜嘢啱佢食，剩係好鍾意食啲炸嘢(第一次比佢食咁多)，問佢要唔要食粉又話飽喎，番到酒店樓下便利店至買個20baht即叮漢堡包佢食。
仲有今晚的高潮未講：由於係傳統泰式餐廳，冇蛋糕order.個waitress知係生日就推介甜品芒果糯米飯(佢話可插支蠟燭吹)，之後嚟到冇蠟燭問番佢，佢居然啊一聲連個飯都拎走，搞好耐唔知搞乜，原來..........鋼琴聲起伴奏，三個waitress每人手拎兩個小小煙花一齊大唱生日歌，好驚喜之餘我又覺好搞笑(咁大個人生日搞啲咁嘢好似好核突)，跟住全場食客(大多係外國人)拍掌，嘩！真係好特別同難忘呀！(事出突然，冇影video只係臨尾影到兩張搞笑相作紀念)
恩祈最開心時刻:吹蠟燭。足足點咗又吹咗成十次都有。個芒果糯米飯好甜好好食。
咁就過咗一個無蛋糕但好得意的生日啦。
門口影多兩張相(背後係人手雕花生果)就拜拜咯！我哋兩個件母女裝襯唔襯呢？
沒有留言:
張貼留言