泰國布吉島曼谷七天自由行@ day 5 2010.03.28 Mecure to Ibis

今朝都係冇包早餐，尋晚試咗啖恩祈的20baht漢堡包都幾好味，反正有個大露台(雖然望街景)，就叫daddy落樓下family mart又買咗三個唔同款的熱辣辣漢堡，再加番杯咖啡在露台望風景舒服地嘆早餐，非常悠閒呢。(酒店門口仲有檔香蕉pancake幾正呀daddy又話污糟唔准試，生蝦咁正又話有肝炎又唔比食)

食完早餐恩祈又話要做功課

周圍睇吓間酒店，頂樓酒吧有個迷你池，我以為係好淺比人飲酒時的浸腳池，點知好似成兩米深，深過樓下泳池好多大人都會沒頂，唔知點解我見親的泳池愈細就愈深，不過呢個係我見過最細的泳池。

晨早見唔係太熱出去行吓街，經過對面的Marriott(上)同穿過Holiday Inn resort舊翼(下)嘅泳池就到Patong Beach.

Patong Beach 街頭

行番去Mecure就除衫跳落水咯。

daddy在按摩池幾嘆

又扮識游水

要離開呢個 very nice pool啦。

冇換泳衣只係沖吓水抹吓身就執嘢check out.諗住食啲嘢之後在下一間酒店繼續再游嘛。下面係佢哋兩父女畫的媽咪同birthday cake.....咁就係生日禮物咯，好開心呢！

搭tuk tuk去Ibis Hotel(雖然係一條大路直行但起碼行三十分鐘)，又要200baht，搭車幾分鐘就到開價仲250baht真係貴到離譜，又唔係真的士，所以街上好多tuk tuk幾乎冇人會搭，我估每架走兩三轉就賺夠可收工。

與Mecure同屬Accor酒店集團的Ibis屬下價酒店，大堂簡約，間房、廁所同張床細過Mecure好多，個露台得番四份一都冇，由奢入儉個感覺真係唔係幾好有啲唔開心，但係聽朝四點幾就走就算啦，以百幾蚊一晚嚟講其實都好正啦。(以前在Pattaya都住過Ibis都好唔錯)

一望到個泳池細到呀！不過後來游過又幾好游，因為冇乜人呀尤其最緊要冇香港人(自己係港人都嫌港人嘈)，而且都有個bb池。

地點都好適中，轉左行出去就係Patong Beach個起點啦。

Ibis轉右行出大路冇耐就係都幾出名的Brilay雞飯。

35baht一碟細雞飯或叉燒飯連湯，15baht一支可樂，食咗三碟再後加多一碟大雞飯(45baht)，好味又好飽都唔駛200baht.

行轉頭番酒店見到有間internet cafe.只係 1 baht/minute.啱晒正想要做聽日番bangkok的web check-in 揀番個靚機位，兩間酒店上網都要收100baht/30 minutes.呢間網吧最低消費都只係10baht.個姐姐仲要送個甜柑仔比恩祈食，daddy話蝕埋比我哋。