今日一早七點集合參加咗外島遊，有小朋友只可以去近近哋啱細路嘅雞蛋島Khai Island半天團，如果唔係真係想去Racha甚至Similan嗰啲人間仙境呀！
坐咗定定的快艇20分鐘左右就到第一站Khai Nai Island.就咁睇都好靚，但活動範圍好細，冇所謂啦，主要都係同恩祈玩餵魚仔啫。
啲水好清啲魚又奇多(多數係黃黑間條間中有啲藍色魚好靚)，好似約好嚟開餐......弊啦，咁多魚幾多麵包都唔會夠，佢哋開始咬我哋啦，恩祈話啲魚食佢隻腳啲肉，已經係冇膽嘅佢開始喊咁口要走，而daddy仲搞笑，話啲魚咬佢胸前兩點好痛喲！
我真係唔識用冇觀景要睇screen的相機，尤其猛烈陽光下反晒光點睇呀。唯有靠估，影唔到恩祈個頭！上面三張相係最清嘅，因為部相機一落海水(係第一次)居然見到個mon有啲霞氣，影出嚟啲相開始朦查查，又好似加咗soft咁。
其實啲水好清而家部機影到好濁咁，再加埋恩祈鬼殺咁嘈要走，好唔開心呀！
恩祈要上岸唯有佢睇番我玩餵魚
好在過咗一陣霞氣消失咗影啲相又好番啲清楚啲，不過一落海水又差咗，慶幸冇入到水，呢啲所謂防水機都係玩吓唔好買咁貴信唔過呀。
部相機放進水中亂影的作品
跟住上船去Khai Nui Island就在海中心snorkelling.好奇怪daddy佢每次一用條吸氣管都會入水同濁親(反而我唔多識游水但用咗就連救生衣都唔駛著潛得好爽)，佢就咁徒手潛都得，勁呢！不過佢話啲珊瑚唔多靚。
我就陪恩祈在快艇上等。其間仲認識咗隔離呢位鬼妹仔，佢係06年5月14日出世，細恩祈一日咋。佢好多嘢同恩祈講，而恩祈就一味淨係笑同點頭。
snorkelling後又趕住去第三站，另一個島叫Khai Nok Island.水清沙靚但好鬼死曬！
恩祈又縮腳驚比魚啄。
呢度都有啲魚，恩祈又叫晒救命。真係呀，仲等我專登帶佢嚟以為佢見到魚仔會好開心，結果好心做壞事。好在佢係唔收錢free嘅。
有支樹枝玩吓至笑番！之後團個導遊開枱開餐，有非常好味的三文治、生果、飲品(之前在船上都係汽水同水任飲)。
十二點左右回程啦。可以離開恩祈好開心，daddy唔夠喉。其實半日同一日團收費只係相差200銖(700 & 900 baht)
番到碼頭有上船時影的合照賣，160baht好靚想買的時候，我老公居然多口講價100baht.人哋唔肯，為老公面子唯有走唔要.....上到車好後悔，影到我哋三個好靚又有特色相架，難得嚟到又唔係貴講乜嘢價呀，比我怨到番香港。講番回程送番酒店，我叫司機在Jungceylon放我哋落車，我哋在food court餓鬼投胎叫咗好多嘢食，其中有好正的辣椒豬肉飯同最好味的泰國fried eggs.
食完飯恩祈見到麥當勞又要食雪糕，貴過香港少少啦。
沒有留言:
張貼留言